Deklarasyon

DEKLARASYON KONGRE NASYONAL PEYIZAN YO

Nou menm ki siyen dokiman sa a, nou rekonèt pwojè òganizasyon pwodiksyon nasyonal la kab reyalize sèlman avèk kreyasyon yon Ministè Pou Zafè Peyizan nan peyi nou an. Nan sans sa a, nou deside e nou deklare :

1. pou prezidan an ansanm ak premye minis la, ansanm ak palmantè yo, (Chamn sena ak Chanm Depite) pou yo kreye prese prese, san pèdi tan yon Ministè Pou Zafè Peyizan. Ministè sa a dwe gen Biwo l nan chak seksyon kominal yo. Konsa pou yo ede peyizan yo jwenn tout sèvis leta yo lakay yo kote y ap viv la.

2. Biwo Ministè zafè peyizan yo ap fòme nan chak seksyon kominal ak reprezantan Kazèk yo, reprezantan òganizasyon peyizan ki nan zòn nan ak teknisyen espesyalize k ap travay an pèmanans ak peyizan yo nan seksyon kominal la.

3. Biwo sa a ap gen reskonsablite pou l aplike tout politik ministè zafè peyizan yo nan seksyon kominal la, jere tout finansman k ap soti nan ministè a pou finanse aktivite peyizan yo nan zòn nan.

4. Biwo sa a responsab tou pou ede peyizan yo ak òganizasyon peyizan yo jwenn tout papye legal yo bezwen pou yo kapab mennen aktivite yo tankou ( pyès idantite, batistè, franchiz dwanyè pou òganizasyon yo, ekzonerasyon taks, rekonesans legal ak tout lòt dokiman legal òganizasyon peyizan yo kapab bezwen pou yo fonksyone nan peyi nou an )

5. Biwo sa a responsab tou pou ede divès òganizasyon ki genyen nan seksyon kominal la travay men nan men tankou yon platform pou seksyon kominal la.

6. Atravè biwo ministè a fòme nan chak seksyon kominal yo, men kèk sèvis li dwe ede peyizan yo jwenn :

a) Dlo pou bwè ak pou wouze tè: fè dlo nan mòn rete nan mòn pou ogmante pwodiksyon manje nan peyi a.

b) Yon Latrin nan lakou chak fanmi peyizan

c) Yon bon wout betonnen nan chak Seksyon Kominal

d) Yon Sant Sante ak yon Famasi nan chak Seksyon Kominal

e) Yon Lekòl Fondamantal ak yon Lise Teknik

f) Yon Sant Kiltirèl ak Sèvis entènèt

g) Yon Sant Espotif

h) Yon Ekip Teknisyen Espesyalize k ap travay an pèmanans nan Chak Seksyon Kominal

i) Yon Bank Zouti Agrikòl ak yon Enstitisyon Kredi pou kore Ti Antrepriz yo ak aktivite agrikòl yo

j) Yon Sou Komisarya PNH ak 5 Polisye pou pi piti

k) Yon Biwo Eta Sivil nan Chak Seksyon Kominal

l) Yon Tribinal Pou Lapè nan chak Seksyon Kominal

m) Entegrasyon Pwojè Òganizasyon Peyizan yo nan Bidjè Nasyonal peyi a

n) Mete chak ane karant milyon goud nan bidjè nasyonal la pou chak seksyon kominal pandan 5 pwochèn ane yo kòmanse nan ane fiskal 2008 - 2009.

o) Kreye posiblite pou mete limyè nan chak Seksyon Kominal ( enèji van, enèji solèy, biyogas elatriye)

p) Kreye travay an pèmanans pou plizyè moun nan Seksyon Kominal yo, nan fè rebwazman, konsèvasyon sòl, pwoteksyon Basen Vèsan ak pwoteksyon anviwonman elatriye.

Moun ak òganizasyon ki siyen deklarasyon sa a :